Kabanata 2

Nagkukumahog na tumakbo si Lisbeth sa ospital, at aksidenteng nakabangga si Sebastian York sa pasilyo.

Sa wakas, naibulalas din niya ang katanungang kanina pa bumabagabag sa kanyang isipan, "Sa estado mong 'yan, paniguradong pipila ang mga babae makasal lang sa'yo. Bakit ako pa ang pinili mo?"

Nasira na ang kanyang mukha, bagsak na ang kanyang karera, at isa pa siyang inang hiwalay sa asawa.

Hindi naman ikinahihiya ni Lisbeth ang mga ito, pero gaya nga ng matalim na isinumbat ni Leopold—para sa karamihan, isang malaking pabigat ang kanyang ina at si Dennis, parang mga balong malalim na walang katapusan at hindi kailanman mapupuno.

Samantalang si Sebastian ay ang nag-iisang tagapagmana ng York Group, ang pinakamayamang negosyante sa Sovereign City, at isa ring kinikilalang aktor sa buong mundo.

Bukod sa kanyang nakakabighaning kakisigan, bawat kilos niya ay kakikitaan ng pino at awtoridad na nagmumula sa kanyang mayamang angkan.

Kung tutuusin, langit siya at lupa naman si Lisbeth—milya-milya ang agwat nila sa isa't isa.

Hanggang sa araw na ito, tatlong beses pa lang silang nagkikita ni Sebastian.

Ang una ay sa isang awards ceremony kung saan nagbatian lang sila ng tango at tipid na ngiti.

Ang pangalawa ay noong malaman niyang siya ang compatible na bone marrow donor para kay Dennis na nahanap sa records ng ospital. At nang mismong araw na iyon, agad na hiningi ni Sebastian ang kanyang kapalit—kasal!

Paano naman siya maniniwala doon, 'di ba?

Bahagyang kumunot ang noo ni Sebastian. "Malaking tagahanga ang mga magulang ko ng pelikula mong 'Song of Summer.' Tumatanda na sila at humihina na ang katawan. Ang pakasalan ka ang tutupad sa hiling nila."

Wala nang nagawa si Lisbeth. "Sige. Kaso, kakatapos lang ng diborsyo ko ngayon kaya hindi muna tayo pwedeng magpakasal agad. Kailangan ko pa ng ilang araw para ayusin ang mga naiwang gusot."

Nakahinga nang maluwag si Sebastian at mabilis na sumagot, "Walang problema!"

Ilang taon na siyang naghintay—ano ba naman 'yung ilang araw pa, 'di ba?

Nang magkasundo na sila, dumiretso na sila sa opisina ng doktor para i-schedule ang operasyon.

May acute leukemia si Dennis, at dahil may nahanap nang angkop na donor, gusto ng doktor na maoperahan agad ang bata sa lalong madaling panahon.

Dinala si Sebastian para sa mga pagsusuri bago ang operasyon upang kumpirmahin ang match, habang nagtungo naman si Lisbeth sa main lobby.

Pagkatapos na pagkatapos niyang magbayad sa kahera, paglingon ni Lisbeth ay nagulat na lang siya nang dumugin siya ng mga tao. Sunod-sunod ang pag-ilaw ng mga camera habang pilit na inilalapit sa mukha niya ang mga mikropono.

"Miss Whitaker, nabalitaan po namin na nahanap niyo si Mr. York para mag-donate ng bone marrow sa anak niyo. Totoo po ba ito?"

Bago pa man siya makasagot, ilang mikropono pa ang itinapat sa kanya.

"May lihim po ba kayong relasyon ni Mr. York? Napakababa po kasi ng tsansa na mag-match ang hindi magkadugo. Posible po bang anak sa labas ni Mr. York ang bata?"

"Kahapon, nagtalo po ang asawa niyo at si Mr. York dito sa ospital. Dahil po ba ito sa nalaman niyang hindi sa kanya ang bata?"

"Lisbeth, nangaliwa ka ba kasama si Mr. York habang kasal ka pa at nagbunga ito? Nadala ka lang ba ng tukso o matagal na itong planado?"

"Miss Whitaker..."Naghahalo ang mga tunay na reporter at paparazzi, at bawat tanong ay mas matalim pa kaysa sa nauna.

Naikuyom ni Lisbeth ang kanyang mga kamao, nanlilisik ang mga matang nakatingin sa kumpol ng media. Halatang handang-handa sila. Wala nang duda kung sino ang nasa likod nito.

Handa ba talaga sina Elora at Leopold na tatakan si Dennis bilang isang anak sa labas masira lang ang pangalan niya? Idinamay pa talaga nila si Sebastian para mas maging pyesta ang iskandalo!

Alam ni Lisbeth na kailangan na niyang magbigay ng pahayag ngayon din, kundi ay magiging napakalala ng epekto nito sa buhay niya.

Pinipigilan ang nag-iinit na galit, mariin siyang nagsalita, "Hanggang ngayon, wala po akong anumang relasyon kay Mr. York! Ang ama ng anak ko ay ang dati kong asawa na si Leopold Hearst. Pwede po nating patunayan—"

Ngunit isang malakas na sigaw mula sa likuran ng mga tao ang pumutol sa kanya, "Lisbeth! Pinagtatakpan mo pa rin ba ang katotohanan?!"

Napalingon ang kalahati ng mga reporter sa pinanggalingan ng boses.

Nakipagsiksikan si Leopold sa mga tao hanggang sa makaharap niya si Lisbeth. Nakabuntot naman sa kanya si Elora na nakasuot ng puti.

Kinausap ni Leopold ang media nang may malinaw at kalkuladong pananalita, "Nang mabuntis si Lisbeth, comatose pa ako dahil sa isang pagsabog. Paano namang makakabuntis ng babae ang isang pasyenteng walang malay?"

Napakunot-noo si Lisbeth at akmang magsasalita, ngunit hindi siya binigyan ni Leopold ng pagkakataong ipagtanggol ang sarili.

"Isa pa, alang-alang sa batang tumatawag sa aking 'Daddy' at sa naging kasal namin, palihim akong nagpunta sa ospital at umaasang baka sakaling pwede akong maging donor. Ang resulta? Hindi man lang ako match sa batang 'yon!"

Pabitin siyang tumigil para magbigay ng diin. "Pero ang aktor na si Sebastian York, perfect match siya! Ano sa tingin niyo ang ibig sabihin n'n?"

Nagkatinginan ang mga reporter, tila nagkakaintindihan. Ipinapahiwatig nito na hindi gawa-gawa lang ang mga tsismis—siguradong matagal nang may kalaguyo si Lisbeth, at si Sebastian 'yon!

Ang sikat na aktor, na ni minsan ay hindi nasangkot sa anumang iskandalo, ay palihim na nakipagrelasyon sa isang may-asawa, nakabuo ng anak sa labas, at hinayaan ang legal na asawa na palakihin ito?!

Sumabog sa kaguluhan ang paligid. Mas naging matalim ang mga tanong, na may halong pangungutya at panghuhusga.

Desperadang nagpaliwanag si Lisbeth hanggang sa mamaos ang boses niya, pero walang nakikinig.

Gusto lang nilang malaman kung gaano na katagal ang bawal nilang relasyon ni Sebastian. May nagtanong pa nga kung ilang beses na silang natulog nang magkasama.

Patuloy sa pagpapaliwanag si Lisbeth habang napaatras nang napaatras hanggang sa makorner siya sa pader at wala nang matakbuhan.

Malamig niyang iniangat ang tingin kay Leopold at mapait na sinabi, "Talagang ginagawa mo ang lahat para sirain ako, 'no? Wala ka nang pakialam kahit madamay pa ang sarili mong reputasyon! Bakit? Hiwalay na tayo—takot ka pa rin bang maghabol ako sa'yo?"

Bumaba ang boses niya sa isang mapanganib na bulong. "Huwag kang mag-alala, hindi ako kasing dumi at kasing sama ng iniisip mo! Kaya kong magmahal nang totoo at bumitaw nang tuluyan, pero sana hindi mo sinisiraan si Dennis! Kapag bumalik na ang alaala mo, pagsisisihan mo 'to!"