Kabanata 2

Nang buksan ni Cedric ang balot at makita ang mga papeles ng diborsiyo, walang pag-aalinlangan niya itong itinapon sa kalapit na basurahan.

Bakas sa kanyang mukha ang matinding pandidiri at paghamak.

Isa na namang desperadong gimik para magpapansin.

Talagang basang-basa na niya ang mga galawan ni Katniss.

Nang gabing iyon, maagang natulog si Katniss pagkatapos ng kanyang panggabing gawain, ngunit binangungot lamang siya.

Isang saglit, nasa altar siya kasama si Cedric, nangangakong sasamahan ito habambuhay; sa sumunod na sandali, muli siyang binabalikan ng eksena kahapon kung saan huli niya itong nag-check in sa isang hotel kasama ang ibang babae.

Lahat ng mga babaeng nakasama nito ay nagpakita na parang mga multo, ginugulo ang kanyang pagtulog.

"Cedric!"

Napabalikwas ng bangon si Katniss, basang-basa ng malamig na pawis ang kanyang buong katawan.

Sumandal siya sa headboard, namumutla at humihingal, nang biglang bumukas ang ilaw. Napapikit siya nang bahagya, inaaninag ang anino ng isang lalaking nakatayo sa may pintuan.

Nakatayo roon si Cedric na nakasuot ng itim na polo, malamig at walang emosyon ang kanyang mga titig.

"Tinatawag mo ang pangalan ko habang natutulog ka, tapos papadalhan mo ako ng papeles ng diborsiyo?" Puno ng pang-uuyam ang kanyang boses.

Mas lalong namutla ang mukha ni Katniss.

"Alam ko kung anong gusto mo—isang anak para masiguro ang posisyon mo bilang Mrs. York. Ibibigay ko 'yan sa'yo."

Tinanggal ni Cedric ang kurbata sa kanyang leeg, dahan-dahang naglalakad palapit kay Katniss.

Habang lumalapit siya, umabot sa ilong ni Katniss ang matamis na amoy ng pabango ng ibang babae mula sa kanya.

Muling nag-flash sa isip niya ang nangyari kagabi.

Nasa balikat na niya ang kamay ni Cedric, handang hubarin ang manipis niyang silk na nightgown.

Natauhan si Katniss at, gamit ang lakas na hindi niya inakalang mayroon siya, itinulak niya ito palayo.

"Huwag mo akong hahawakan. Nakakadiri!"

Kailanman ay hindi niya tinanggihan ang mga paglapit nito.

Tutal, ilang taon na niyang minahal si Cedric at totoong gusto niyang magkaroon sila ng anak.

Pero hindi niya matanggap ang pambababae nito, lalo na't dumiretso ito sa kanya galing sa kama ng ibang babae.

Agad na nagdilim ang mukha ni Cedric, bakas ang inis sa kanyang tono.

"Hanggang kailan ka ba mag-iinarte ng ganito?"

Hinila ni Katniss ang kumot pataas, maingat na nakabantay sa kanya.

"Hindi ako nagbibiro tungkol sa diborsiyo. Seryoso ako."

Ang kasal na ito ay naging isang hawlang sinadyang gawin para sa kanya. Simula nang makasal sila, naging malambing at maasikaso siya, ipinagluluto ito at pinag-aralan kung paano maging perpektong asawa.

Naging uto-uto siya sa paniniwalang kung magtitiyaga siya, sa huli ay makukuha rin niya ang puso ni Cedric.

Pero sinampal siya ng katotohanan, masakit ngunit nakakagising.

Hindi niya kayang patinuin ang lalaking ito.

"Pareho na tayong pagod. Ito ang pinakamabuting desisyon para sa ating dalawa. Bibigyan kita ng isang araw para pag-isipan ang diborsiyo. Kung pipirma ka bago matapos ang palugit, aalis ako nang walang kinukuha ni isang kusing. Pero kung palalampasin mo ito, idadaan ko ito sa korte at kukunin ko ang kalahati ng mga ari-arian mo."

"Nasa sa'yo ang desisyon."

Nanlamig ang mga mata ni Cedric habang sinusuri siya, pinasadahan siya ng tingin ng mga mapanuri nitong mata.

Sa ilang taon nilang pagsasama, sinubukan ni Katniss ang lahat ng paraan para makuha ang atensyon niya, pero ito ang unang pagkakataon na nabanggit niya ang diborsiyo.

"Lahat ng ito dahil lang sa nangyari kagabi? Katniss, pwede ba, tigilan mo na ang pagiging praning? Kakauwi lang ni Lillian sa bansa at lasing siya. Anong masama kung dalhin ko siya sa hotel?"

Nang sandaling iyon, pakiramdam ni Katniss ay may naghagis ng buhangin sa kanyang mga mata.

Nanlabo ang kanyang paningin, at hindi niya makayanan ang sakit.

Siya pa pala ang praning...

At si Lillian pa ang kaibig-ibig?

Sa sobrang panlalamig at pagbabago ng pakikitungo ni Cedric, ramdam na ramdam niyang talong-talo na siya kay Lillian. Wala na siyang laban.

"Cedric, punong-puno na ako sa walang katapusan mong pambababae. Ang kailangan mo ay isang asawang sunud-sunuran at martir na magbubulag-bulagan sa panloloko mo, pero pasensiyahan tayo, hindi ko na kaya 'yan!"

Huminga nang malalim si Katniss. Bumangon siya mula sa kama at dumukot ng isa pang kopya ng mga papeles ng diborsiyo mula sa nightstand.

Sa takot na baka dedmahin lang nito ang kopyang ipinadala niya sa opisina, sinadya niyang magpahanda ng dalawang kopya sa abogado niya.

"Kung gusto mong protektahan ang bilyun-bilyon mong yaman, mabuti pang pumirma ka na ngayon. Dahil pagpatak ng bukas, kukunin ko na ang kalahati niyan."

Matalim ang mga titig ni Cedric. Tila ba gusto nitong tunawin ang mukha niya sa talim ng tingin nito, bago bumaba ang mga mata nito sa mga papeles na inaabot niya.

Hindi ito kinuha ni Cedric, at hindi rin naman binabawi ni Katniss. Binalot sila ng nakakabinging katahimikan sa gitna ng tensiyon.

"May masamang balik ang pagiging masyadong gahaman. Mula pa noong araw na pumasok ka sa pamilya York, alam mo na kung anong pinapasok mo. Tapos ngayon, sasabihin mo sa akin na bukod sa pera ko, gusto mo pa maging tapat ako sa 'yo?"

"Katniss, hindi mo ba naiisip kung gaano ka kahibang ngayon?"

Lantaran ang pandidiri at panghahamak sa huling binitawan niyang salita.

Padabog nitong tinabig ang kamay ni Katniss. Dahilan para magliparan at magkalat ang mga papeles ng diborsiyo sa sahig.

Walang-sabi na dinampot ni Cedric ang kanyang jacket at tumalikod upang umalis.

Tulalang napako ang tingin ni Katniss sa mga nagkalat na papel. Ang puso niyang durog na durog na, tila ba muling hiniwa at pinadugo.

Totoo namang negosyo lang ang naging batayan ng kasal nila. Isang kasunduan.

Utang na loob nila sa lalaki kung bakit naisalba ang naghihingalong Astor Group. Pero hindi ibig sabihin noon ay hindi niya minahal ang asawa. Kasi, aling babae ba naman ang hindi mangangarap ng isang tahimik at buong pamilya kasama ang lalaking pinakamamahal niya?

"Cedric, minahal naman talaga kita nang totoo... pero ngayon, puro alaala na lang ang natitira."

"Nakakapagod din palang mahalin ka. Sukong-suko na ako. Hindi ba puwedeng palayain na lang natin ang isa't isa?"

Pabulong niyang usal, habang nakatitig sa papalayo nitong likuran.

Nasa tapat na ng pinto si Cedric pero napahinto ito nang marinig ang sinabi niya. Lumingon ito at pinukol siya ng napakalamig na tingin habang nakatayo siya roon, mukhang kaawa-awa at nawawala sa sarili.

"Katniss, hiwalayan? Huwag na huwag mo 'yang pangarapin."

Sa mga binitawan nitong salita, para na rin siyang hinatulan ng kamatayan.

Mabilis na humakbang palayo si Cedric. Naiwan si Katniss na napalugmok na lang sa sahig, tila naubos ang lahat ng lakas sa katawan.

Kinabukasan ng umaga, pinilit niyang ayusin ang sarili. Bumaba siya, bihis at handa nang pumasok sa opisina.

Naabutan niya si Cedric sa sala, prenteng nakaupo habang nagbabasa ng pinakabagong financial newspaper.

Nang marinig ang mga yabag niya, nag-angat ito ng tingin.

Blangko ang mukha ni Katniss. Dedma lang siya sa presensiya nito at dumiretso sa may pintuan para magpalit ng sapatos.

Dalawang gabi. 'Yan lang ang ibinigay niyang palugit sa sarili para magmukmok at magpakalugmok.

Bata pa siya. Napakahaba pa ng buhay niya para lang sayangin sa isang toxic na relasyon.

Bakas ang inis sa mga mata ni Cedric. "Katniss, hanggang kailan ka ba mag-iinarte nang ganito? Tama na, nakakasawa na."

Sa wakas ay tinapunan siya ng tingin ni Katniss. Isang mapaklang ngiti ang sumilay sa maganda nitong mukha. "Bakit, ano bang ginagawa ko?"

Saglit na natameme si Cedric.

Nagpatuloy si Katniss, "Diba ito naman ang matagal mo nang gusto? 'Yung tahimik at hindi kita kinukulit. Ayan, ibinibigay ko na sa 'yo."

Dati-rati, laging nakabuntot si Katniss kay Cedric. Bawat maliliit na detalye ng araw niya, kinukuwento niya rito. Pero ano bang napala niya? Puro panlalamig at pambabalewala. Ang sabi pa nga nito noon, kailangan daw nito ng space.

Kaya ngayon, ibibigay niya ang space na 'yon.

Itinulak ni Katniss ang pinto at tuluyan nang umalis.

Hindi maipinta ang mukha ni Cedric. Sakto namang tumawag ang kanyang assistant.

"Sir York, nagsimula na pong gumalaw si Misis para agawin 'yung resort project na pinupuntirya natin."